ARTIKULUTIK KANPOKO NOTAK:
DEFINIZIOA

Basurdea da gaua. Basurdea da basoa, lainoa. Basurdea da kolpatzea, korrika egitea, azala ondo babestea, azal gogor urratua. Basurdea da basatia izatea. Basurdea da nekatu gabe kilometroak ibiltzeko gai izatea. Babeslekutik mundua zelatatzea. Basurdea da lurraren mugimendua nabaritzea. Amets egitea. Faltan botatzea. Basurdea da begirada lausoa, distortsioa, itsutasuna. Ez-ikusiz mundua ulertzea. Basurdea da pausoen soinua hosto bustien gainean. Basurdea da indarra. Basurdea da erasoa, kidetasuna, sena, bakardadea. Basurdea da dolua. Iluntasunean bidea topatzea, ezintasunean bidea topatzea. Gogortasuna. Hotza. Basurdea da euriaren soinua. Basurdea da gauari itxarotea. Basurdea da sima bat, eta kobazulo bat, eta sasi ezinezkoak. Basurdea da lohia. Basurdea da bizkarra bizkarraren kontra. Lokatzaren zaporea ahoan sartzea. Basurdea da suntsitzaile bihurtzea. Etsaiak onartzea. Basurdea da tabernako paretan zintzilik dagoen burua. Harrotasuna. Basurdea da gaueko soinu guztien bilduma. Urrutikoa intuitzea. Alerta. Basurdea da argiek begietan min ematea. Basurdea da kotxe bozina bat entzutea hil aurretik. Basurdea da gorpu bat errepidean. Basurdea da desagertzea. Basurdea da oihu egitea.